7-12-2024, 12:17
A
+Suriya prezidenti Bəşər Əsəd ölkədədir. Eyni zamanda, onun həyat yoldaşı və uşaqları Rusiyaya, kürəkənləri isə Birləşmiş Ərəb Əmirliklərinə köçüblər.
Söz.az xəbər verir ki, bu barədə “Street Journal” mənbələrə istinadən yazıb.
Məlumata görə, Misir və İordaniya rəsmiləri Əsədə respublikanı tərk etməyi və müxalifət nümayəndələrinin də daxil olduğu müvəqqəti şura yaratmağı təklif ediblər.
Bildirilib ki, Qətər, BƏƏ və digər ərəb ölkələri Suriya hökumətinin sürətlə devrilməsi və regionda sabitliyin pozulması ehtimalından getdikcə daha çox narahatdırlar.
Suriya rəhbəri Türkiyədən baş verənlərə müdaxilə etməsini, Misir, BƏƏ, İordaniya və İraqdan silah istəyib, lakin hər yerdə ona rədd cavabı verilib.
Hüms hazırda Suriyada hökumətin nəzarəti altında olan və Dəməşqlə üsyançıların nəzarətində olan ərazilər arasındakı yolda yerləşən sonuncu böyük şəhər olaraq qalır.
Bu şəhərin itkisi hakimiyyəti onlara sadiq olan ələvi azlığının cəmləşdiyi Aralıq dənizi sahillərinə çıxışdan məhrum edəcək.
Xatırladaq ki, suriyalı üsyançılar uzun illər davam edən hazırlıqdan sonra noyabrın 27-də səhər saatlarında genişmiqyaslı hücuma başlayıblar.
10 gün ərzində onlar çox sayda yaşayış məntəqələrini, hərbi bazaları, aerodromları, silah anbarlarını ələ keçirə bildilər.
