Şəmkirdən Qarabağa işləməyə gedən qardaşlar faciəli şəkildə öldü

Ağcabədi rayonunda iki qardaşın ölümü ilə nəticələnən yol-nəqliyyat hadisəsini törətməkdə təqsirli bilinən Anar Həmidovun məhkəməsi başa çatıb.

Söz.az Publika.az-a istinadən xəbər verir ki, Lənkəran Ağır Cinayətlər Məhkəməsində 1977-ci il təvəllüdlü sürücüyə hökm oxunub.

Qeyd edilib ki, hadisə zamanı Anar Həmidov “Toyota Carolla” markalı avtomobillə Bəhramtəpə-Mingəçevir yolunun Ağcabədi rayonu Hacıbədəlli kəndindən keçən 95.5-ci kilometrliyində geriyə dönmə manevri edirmiş. Bu zaman onun idarə etdiyi avtomobil “Lada Priora” markalı digər maşına çırpılıb. Nəticədə həmin avtomobildə olan Şəmkir rayon Seyfəli kənd sakini 1996-cı il təvəllüdlü Elvin Hüseynov və qardaşı Orxan Hüseynov aldıqları ağır xəsarətlərdən vəfat ediblər. Daha 2 nəfər isə xəsarət alıb.

Vəfat edən qardaşlar həmin vaxt Şəmkirdən Qarabağ zonasına işləməyə gedirmiş.

Məhkəmənin hökmü ilə qəzanı törədən sürücü A. Həmidov cinayət əməlində təqsirli bilinib. O, 5 il müddətə azadlıqdan məhrumetmə cəzasına məhkum edilib. Cəzasını məntəqə tipli müəssisədə çəkəcək şəxsin sürücülük hüququ da 3 il müddətə məhdudlaşdırılıb.