Faciə! Valideynlər çox sayda şagirdin ölümünə səbəb oldu

Nigeriyanın İbadan şəhərindəki Basorun İslam Liseyində keçirilən Milad şənliyində çox sayda uşaq ölüb.

Söz.az xarici KİV-ə istinadən xəbər verir ki, buna səbəb valideynlərin pulsuz paylanılan hədiyyələri almaq üçün yaratdığı izdiham olub. 

İzdihamda 30-a yaxın şagird həyatını itirib.

Oyo əyalətinin qubernatoru Seyi Makinde açıqlamasında faciəvi hadisəni təsdiqləyib. Qubernator Makinde, sosial media platformasındakı paylaşımında "Oyo Dövləti üçün çox kədərli bir gündür" deyib.

"Bu ölümlərə görə sevinci qəflətən kədərə çevrilən valideynlərə başsağlığı veririk. Daha çox ölüm hallarının qarşısını almaq məqsədi ilə məkanda asayişi qorumaq üçün mühafizəçilər təyin etmişik. Hadisə yerinə tibb işçiləri və təcili yardım maşınları da göndərilib. Tədbir dayandırılıb və iştirakçılar təxliyə edilib. Biz məkanın təhlükəsizliyini təmin etmək üçün bütün real tədbirləri görürük", - deyə Makinde vurğulayıb.

Faciəyə səbəb olan insidentə görə məsuliyyət daşıyanların saxlandığı və ətraflı araşdırma başlandığı bildirilib.